TU, CA NUN CHIAGNE!

Comm'è bella a muntagna stanotte
bella accussi nun l'aggio vista maie!
'N'anema pare rassignata e stance
sotto cuperta 'e chesta luna janca.

Tu che nun chiagne e chiagnere me faie,
tu, stanotte addò staie?
Voglio a te!
Voglio a te!
Chist' uocchie te vonno
n' ata vota vedè!

Comm'è calma 'a muntagna stanotte
cchiù calma 'e mo nun l'aggio vista maie!
e tutto dorme, tutto dorme o more,
e i sulo viglio, per chè veglia Ammore.

Tu che nun chiagne e chiagnere me faie,
tu, stanotte addò staie?
Voglio a te!
Voglio a te!
Chist' uocchie te vonno
n' ata vota vedè!